السلام عليكم
من بنات الفكر ثارت واستباحت فيني
صوت همسٍ في ضميري خافيٍ كنيته
ساهرٍ والليل يامر والعرب ممسيني
وإن غفا جمر المشاعر بالأمل صحّيته
نايفٍ في طعس نايف والطروق تزيني
لارقص للريح ضوي هاجسي غنّيته
ياحروف الشعر قولي قصتي واحكيني
دام نزف الشوق غصبٍ بالورق بكّيته
أصهلت خيل المشاعر صوتها ناصيني
وانتخى فارس قصيدي والقلم سلّيته
أرسم الدمعات ضحكه شفاه سنيني
كود يسعدني زماني لاضحك وارضيته
أرحلي ياهموم هيّا مامضى يكفيني
طفلي الغايب لفاني والحزن سرّيته
له رقيق الشعر غنى بالقسى والليني
ياقسى لينه على كثر ازعله "حبّيته"
أوصفه .. لاتنشدوني وش بقى من زيني
كل زينٍ يذكرونه إصدقه من بيته
له مع السلهام نظره ! تذبح الحييني
وله تغناجٍ يصحّي كل نفسٍ ميته
أختلف نبضي بدمي والسبايب عيني
إن سكت خفت اتكلم وإن حكى لبّيته
أرعشت للبرد كفي .. والعرق كاسيني
الشتا والصيف فيني .. والنظر مليّته
أنتثر فنجال شوقي من كفوف إيديني
وجيت أصافحْه بيميني " بالغلط " (( ضمّيته ))...
مع تحيات ::::: أبوعــــابد :::::